LEGAZPI CITY – Imposible kun ikonsiderar kan Albay Provincial Election Office an pigsasabing amay na pagtransmit nin datos kan nagkapirang vote counting machines (VCM).
Enot kaini, ibinuyagyag ni Jeff Dy, saro sa mga IT experts na naghampang sa joint congressional oversight hearing sa 2019 midterm elections na nagkaigwa nin early transmission nin mga datos an nagkapirang VCM antes an bilangan kan boto.
Nasambit digdi an Libon, Albay na pigsasabing doble an datos na naisumiter alagad dae pa man kumpirmado kun nakaapektar ini sa bilangan.
Paliwanag ni Albay Provincial Election Officer Atty. Neil Canicula sa intrevista kan Bombo Radyo Legazpi, dae makakapagtao nin data kun bako man konektado sa internet an VCM.
Dae man suboot binuksan an VCMs segun ki Canicula.
Mientras tanto, posible man suboot na mahiling asin icheck sa audit log kan VCM kun totoong nangyari an pigsasabing early data transmission.
Nagdepensar man si Comelec Executive Director Jose Tolentino Jr. na dae maapod na pandaraya an amay na paglaog kan datos urog na nagkaigwa nin testing and sealing sa pagbalo kan functions kan VCM, kaya bako na makangalas an early transmission.
