LEGAZPI CITY—Bilang pagsunod sa implementasyon kan ibinabang memorandum kan Department of Transportation (DOTr) na ‘Oplan Biyaheng Ayos: Semana Santa 2025’, ma-deploy an Coast Guard District Bicol nin mga kadugangang personahes sa mga pantalan sa bilog na rehiyon kan Bicol.
Segun ki Coast Guard District Bicol CG Ensign Allyza Novie Bermal, sa intrevista kan Bombo Radyo Legazpi, maabot sa 50 personahes an saindang ide-deploy sa manlaen-laen na lugar huli ta dati na man na may mga personahes na regular na naka-duty sa mga pantalan.
Afuera digdi, igwa man sindang ibubugtak na DOTr Malasakit Help Desk kun saen nakabugtak an mga contact details kan saindang headquarter asin an manlaen-laeng coast guard stations sa bilog na rehiyon na pwedesir i-contact kan mga biyaheros en kaso man may emerhensya.
Sinabi kan opisyal na an saindang opisina an mabantay asin mataong asistensya sa mga pasahero, siring man an pagsagibo nin port inspection asin vessel inspection ngani na maibitaran an mga dae piglalaomang insidente.
Dugang kaini na igwa man sindang abelable na mga land and floating assets para sa ano pa man na kinakaipuhang tabang.
Mientrastanto, nagpagiromdom man ini sa publiko na magin alerto sa mga regulasyon na pigpapaluwas kan mga otoridad urog na an mapadapit sa Semana Santa.
Sinabi pa kaini na preparado an saindang opisina na magtaong serbisyo publiko.
 'Oplan Biyaheng Ayos: Semana Santa 2025', the Coast Guard District Bicol will deploy additional personnel at ports throughout the Bicol region.){kind=link}