LEGAZPI CITY-Pigtuyaw kan Commission on Audit (COA) an suboot nangyaring kapabayaan sa implementasyon kan P200-million shelter assistance program para sa mga biktima kan kalamidad.
Segun sa komisyon, nagkaigwa nin delay sa payout, nagkapirang palyadong tseke, asin bako maayos na pagkapot kan pampublikong pondo.
Dugang pa kan komisyon, na bigo an Department of Human Settlements and Urban Development (DHSUD) na busisihon o i-identipikar an mga benepisyaryo para sa emergency shelter asistance, sa irarom kan Integrated Disaster Shelter Assistance Program kaini.
Sa nasabing programa, an kada pamilya na naraotan nin harong an makakaresibe nin tag-P30,000 mantang an kada pamilya na bahagyang naraotan nin harong an makakaresibe man nin P10,000.
Pigbusisi kan ahensya an emergency response kan Department of Human Settlements and Urban Development sa irarom kan 2024 budget kun sain naaraman na nagsagibo ini nin independent inspection an ahensya sa mga naraot na harong alagad nag-depende ini sa dokumentong isinumiter kan lokal na gobierno.
Nagkaigwa man suboot nin delay sa pagpapaluwas kan asistensya na nagabot sa 59-186 na aldaw an nagin processing time, orog na sa Metro Manila.
Wara man suboot nin malinaw na deadline an departamento para sa nagkapirang lakdang sa pagpapaotob kan programa, kaibanan an validation sa mga dokumento asin pag-aproba sa pondo.
Naaraman man kan komisyon na may duplicate payouts o benepisyaryong nakaresibe kan shelter assistance nin nagkapirang beses hale sa magkaibang ahensiya.
Tinuyaw man kan komisyon an paglaag kan mga benepisyaryo kan bako maayos na mga ladawan, bako kumpletong form na isinumiter asin bako kumpletong dokumento na nagpapatunay na may nangyaring payout.
Susog sa komisyon na nangyari ini sa nagkapirang rehiyon sa nacion.
