LEGAZPI CITY – Padagos an pagkokondusir nin clearing operation sa mga waterways an Local Government Unit kan Sto. Domingo, Albay.
Ini an kasunod kan nagviral sa social media kan nakaagi manungod sa dakulang ugat na nadiskubreng nakabara sa pirang tubo kan tubig sa banwaan.
Segun ki Sto. Domingo Mayor Nomar ‘Bong’ Victoria Banda sa intrevista kan Bombo Radyo Legazpi na regular an saindang paglilinig nganing masulusyunan an problema sa tubig asin sagkod ngonian an diit na sana an nagrereklamo mapadapit sa tubig.
Hagad pa kaini sa saiyang nasasakupan an dikit pang pasensya pa huli ta pigbibisita asin piggigibuhan nin sulusyon an gabos na mga waterways sa saindang lugar.
Basado man sa saindang datos an 70% nang linigan huli ta gabos nang source an saindang nadumanan.
Mawot na kan opisyal na tutukan ngonian iyo an distribution line nganing mapakarhay an supply kan tubig sa saindang lugar.
Kaipuhan ninda sa ngonian iyo an paghanap nin budget urog nang bago siya mag-asumir sa pwesto an nagkaigwa sinda nin negative budget kun kaya labi an saiyang pasasalamat sa mga indibidwal asin grupo na nagdodonar nganing masuportaran an saindang programa.
Plano niya man na makompleto an gabos na pipeline asin waterways na malinigan antes mag-abot an ika-100 na aldaw kan saiyang panenerbihan bilang alkalde.
Pagdoon man ni Banda na bastante an supply nin tubig sa Sto. Domingo asin kaipuhan sana nin maray na distribution asin management sa paagi kan tamang pagpapadalagan kan mga nasa posisyon.
