LEGAZPI CITY- Naglalaom an Commission on Human Rights (CHR) Regional Office 5 na magin bareta sana an mga pigkakahaditan kan nagkapirang namamanwa sa island province kan Catanduanes katakod kan assignment ni Pol. C/Insp. Jovie Espenido.
Sinabi ni CHR Bicol Director Atty. Arlene Alangco sa intrevista kan Bombo Radyo Legazpi na sarong matoninong na lugar an Bicol kaya labi ang pagpangadyi na dae man mabukag an presenteng estado kan rehiyon.
Katakod kaini, tinawang-duon ni Alangco na padagos an isasagibong monitoring sa mga programa kan pulisya tangarig na maasegurar man kun susog pa an mga lakdang sa mandatong sinumpaan.
Kun babalikan, nagin kontrobersyal an pangaran ni Espenido makalihis na magin dating hepe kan Albuera, Leyte kan magadan sa Baybay City Provincial Jail si Mayor Rolando Espinosa taong 2016 mantang sa paglipat sa ciudad kan Ozamiz kaitong 2017, nagadan man si Mayor Reynaldo “Aldong” Parojinog asin 14 na iba pa sa serye kan isinagibong raids.
Dae man nadagos an nakatalaan kutang paglipat ni Espenido sa Iloilo City kun sain nagsisirbe si Mayor Jed Mabilog, saro pang opisyal na nasa listahan suboot kan narco-politicians ni Presidente Rodrigo Duterte.
