Legazpi City – Pigpagirumdom kan Commission on Human Rights an importansya kan ‘Rule of Law’ huli sa padagos na pinagkokonduktar na operasyon kan Philippine National Police sa pag-aresto sa puganteng si Pastor Apollo Quiboloy na pinagtutubudang nagtatago sa mismong compound kan Kingdom of Jesus Christ (KOJC) sa Davao City.
Segun ki Atty. Richard Palpal-Latoc, Chairperson kan Commission on Human Rights, padagos kaining pinagpapangapudan sa duwang lado an pag-obserba kan karapatang pantawo sa ibong kan mga kanya-kanyang pinaglalaban.
Siniyerto kaining pinagbabalanse asin pinag-aadalan kan komisyon an anuman na klase nin pagbalgar o bayolasyon sa siisay man na persona.
Enot nang sinabi kan opisyal na dae matugot an saindang ahensya enkasong madugangan an casualty.
Segun pa kay Palpal-Latoc, pinag-iimbestigaran na man kan saindang lado an mga naireport na paggagamit nin dahas asin karahasan kan kapulisan siring man kan mga nagpapahiling nin suporta kay Pastor Quiboloy.
Dugang pa kaini, padagos man an monitoring kan saindang Human Rights’ personnels na mismong nagbibisita sa lugar.
Kinondenar man kan opisyal an ginibong pang-aatake sa grupo na gikan sa saindang opisina nganing magbantay kan sitwasyon durante kan pagserbe nin arrest warrant kan mga kapulisan sa nasabing lugar.
Sa ngunyan, dae pa nin pinal na report an ahensya dapit sa numero kan mga personang nagiging biktima kan pagbalgar sa karapatang pantao.
