Binasol ni Deputy Spokesperson kan Chinese Embassy Guo Wei si Philippine Coast Guard Commodore Jay Tarriela asin iba pang opisyal sa suboot paglala kan relasyon kan Pilipinas asin China.
Segun ki Guo, urualdaw suboot na nagpapalakop nin kautikan asin dagit si Tarriela na nakaka apektar sa relasyon kan duwang nacion.
Ginibo niya an pahayag kasabay kan pagrumdom kan Pilipinas sa ika-10 anibersaryo kan desisyon kan Permanent Court of Arbitration dapit sa West Philippine Sea.
Sa nasabing desisyon, ibinasura kan tribunal an nine-dash line claim kan China asin binisto an diretsos kan Pilipinas sa laog kan 200-nautical-mile Exclusive Economic Zone.
Bilang kasimbagan, sinabi ni Tarriela na kun masunod sana an China sa international law asin mapundo sa pangha-harass sa mga parasisirang Pilipino asin mga barko kan PCG asin BFAR, magigin matanos an relasyon kan duwang nacion.
Dugang pa niya na an tunay na solusyon, iyo an pagtalikod kan China sa illegal claims kaini asin pagrespeto sa diretsos kan Pilipinas sa nasabing kadagatan.
