LEGAZPI CITY—Nanindugan an grupong Pambansang Lakas ng Kilusang Mamamalakaya ng Pilipinas (PAMALAKAYA) na an China an posibleng responsable sa kun ano man na development na mga istruktura o kakaibang pangyayari sa Panatag (Scarborough) Shoal.
Magigiromdomang may nai-report suboot na may underwater structures sa Bajo de Masinloc sa West Philippine Sea (WPS).
Segun ki PAMALAKAYA Chairperson Pando Hicap, sa intrevista kan Bombo Radyo Legazpi, na puon pa kan 2012 antes ngunyan an dae na suboot naghahale an Chinese Coast Guard sa Scarborough Shoal sa ibong kan bilateral meeting ninda kan Philippine Navy na dapat na sindang mag-uruli sa saindang nacion.
Basado man suboot sa salaysay kan mga parasisira gikan sa Zambales na naglalawod sa WPS na tig-aabungan asin dae na sinda pigpapalaog kan China sa Scarborough Shoal maski nasa 30-20 nautical miles pa sana an saindang rayo sa nasabing kadagatan.
Dugang ni Hicap na sarong malinaw na pagbalgar sa international law asin Konstitusyon an piggigibo kan China sa teritoryo kan Pilipinas.
Nangapudan man an opisyal na dapat magkaigwa nin bilateral o multilateral meeting an gobierno kan Pilipinas kaiba an gabos na lugar na igwang claim na apektado sa dash line kan China.
Mientrastanto, padagos man an pangapudan kan grupo na dapat maresolbaran an isyu sa South China Sea asin West Philippine Sea siring man na dapat manindugang dae pigsusuportaran an mga dikta kan Estados Unidos na magkrear suboot nin ano man na giyera huli sa huri an daog asin biktima digdi an Pilipinas.
