Pig-asigurar kan China an proteksiyon sa mga karapatan kan tulong Pilipinong nakadetine ngonian sa nasabing nacion makalihis akusaran nin suboot pang-e-espiya.
Segun kay Chinese Ambassador to the Philippines Huang Xilian, tinatrabaho na ini kan Philippine Consular office sa China.
Nakikipag-koordinar na man suboot an consular office kan Pilipinas sa Chinese authorities sa gabos na orolay na may kinaaraman sa tuong Pilipino.
Ini an nagin kasimbagan kan Chinese official kan mahapot kun tutugutan kan China na mabisita kan hararaning pamilya an mga nakakulong na Pilipino.
Sa lado man kan Pilipinas, naenot nang sinabi kan Department of Foreign Affairs (DFA) na nagtatao na nin gabos na kinakaipuhang tabang an Philippine Consulate General sa Guangzhou kabale an legal support para sa 3 Pilipino.
Enot na kaini an nanindugan an pirang opisyal kan Pilipinas na bako espiya an 3 Pilipino asin naenot na mang nilinaw kan National Security Council na ordinaryong namamanwaang Pilipino ang mga ini na warang military training.
Posibleng retaliation suboot ini kan China sa Pilipinas makalihis an mga serye kan lehitimong pag-arestar sa mga Chinese na imbwelto sa iligal na aktibidad kan Philippine Offshore Gaming Operators (POGO) sa mga nakalihis na bulan.
