Ipighayag kan Malacañang kan Sabado, Enero 31, na dae napag-uulayan sa ngunyan an Charter Change (Cha-Cha) o proseso kan pag-amyenda sa 1987 Constitution.
Segun ki Palace Press Officer USec. Atty. Claire Castro, sa huring pakikipag-ulay kan Presidente sa saiyang economic team kan Biyernes, Enero 30, 2026, dae nadiskotir an mapadapit sa Cha-Cha.
Imbes an nakatutok si Presidente Ferdinand Marcos Jr. sa pag-uswag kan ekonomiya kan nacion.
Alagad, segun ki USec. Castro, en kaso magkaigwa nin nagibong lakdang an mga lehislador mapadapit sa nasabing orolay, an pag-aadalan man ini kan Presidente.
Ginibo kan Palace official an pahayag kasunod kan pronouncement ni Senate President Vicente “Tito” Sotto III na susuportaran niya an mga plano nganing amyendahan ang 1987 Constitution en kaso man na ibusol ini.
Ini makalihis na pagtibayon kan Korte Suprema ang ruling kaini na nagdedeklarang unconstitutional ang Articles of Impeachment laban ki Vice President Sara Duterte. Segun ki Sotto, malinaw suboot na panghihimasok sa kapangyarihan kan lehislatura ang pangingiaram kan Korte Suprema sa proseso kan impeachment na eksklusibong mandato kan Kongreso. Pagdoon pa kan Senador huli sa nasabing desisyon an inamyendahan na man kan Korte Suprema ang Saligang Batas.
Huli digdi sinabi ni Sotto na mas mamakamaray suboot an Kongreso na mismo an magpapuon kan charter change, taliwas man ini sa dating posisyon kan Senador huli dati niya ining kinontra alagad ngunyan na handa na suboot niya ining suportaran.
Magigiromdoman man na basado sa report kan Philippine Statistics Authority (PSA) sa dalagan kan ekonomiya kan 2025, natapos an taon na igwa sanang 4.4% gross domestic product (GDP). Ini an ikatulong sunod na taong nagpalyar an gobierno na maabot an target kaini huli sa epekto na man kan mga nagrapadong kalamidad asin flood control corruption scandal na nakaapektar sa kumpiyansa kan mga investor asin konsyumer.
Katakod kaini sinabi ni Department of Economy, Planning, and Development (DEPDev) Secretary Arsenio Balisacan na puspusan an piggibong lakdang kan gobierno nganing maibalik an tiwala kan publiko sa paagi kan pagpapatibay pa sa mga serbisyo kan gobierno na nahihiling asin namamatean kan mga Pilipino sa saindang pang-uro aldaw na pamumuhay.
