LEGAZPI CITY- Ipigpoproponir ngonian kan liderato kan Presidential Anti-Corruption Commission (PACC) an pagbabago sa sistema kan gobierno asin asin pagpupuon liwat bilang simbag sa malalang problema sa korapsyon.
Sa intrevista kan Bombo Radyo Legazpi ki PACC chairman Dante Jimenez, napag-araman kan komisyon na langkaban an korapsyon sa laog kan anom na bulan pa sanang pag-iimbestigar sa gabos na sanga kan gobierno mantang imbwelto bako sana man an mga appointed kundi magin an mga elected officials .
Segun pa ki Jimenez na pinakamatunog sa mga korapsyon sa mga proyekto an Department of Public Works and Highways (DPWH) urog na an nagkapirang district engineers.
Pagtataong-duon pa kan opisyal na dawa ‘challenging’ an trabaho, kinakaipuhan nang mag-integrate nin bagong sistema asin mga lakdang na makakatabang sa paglikay sa korapsyon siring man sa tentasyon kan pagkaimbwelto.
Patutsada pa kaining baguhon magin an ‘delaying tactics’ sa justice system mantang pigpo-proseso an pagsusunad nin mga kaso sa mga naprobarang igwang probable cause sa mga kinakahampang na reklamo.
Mientras tanto, nagsayuma na an PACC chairman na sambiton kun anong klase kan gobyerno an pigsasabi kaini urog na trabaho na suboot ini kan Kongreso.
