LEGAZPI CITY—Kinumpirmar kan Coast Guard District Bicol sa pakikipagkoordinar sa Philippine Navy na foreign vessels an nahiling na mga barko sa kadagatan kan Pandan, Catanduanes.
Segun ki Coast Guard District Bicol CG ENS Alyssa Novie Bermal, sa intrevista kan Bombo Radyo Legazpi, an nasambitang foreign vessels kinaimbweltohan kan French Navy, US Navy, asin Japanese Maritime Self-Defense Force na kun saen nagkundusir an mga ini nin naval exercise na pinangengenotan kan French Navy na nagpuon kan Pebrero 8, 2025.
Dugang kaini na an naval exercise isinagibo para mapakusog an koordinasyon asin pagtatarabangan sa pagultangan kan mga nasambit na foreign vessels.
Mientrastanto, pigtaram man kan opisyal na an saindang ahensya preparado na magtaong serbisyo publiko para mamantenir an kaligtasan asin seguridad sa mga kadagatan.
