LEGAZPI CITY- Kinoronahan na an bagong pandok kan Daragang Magayon 2018 kasubanggi sa isinagibong grand coronation sa Albay Astrodome.
Napa-wow ni Rein Hillary Carrascal ng Legazpi City sa nagin performance sa kompetisyon, bako sana an mga paradalan kundi magin an panel of judges urog na sa simbag sa question-and answer portion kun ano an mensahe sa mga Pilipino sa orolay na pangkatoninongan asin pagkakasararo.
Kaibanan sa lupon na naghiling sa talento, gayon asin tali kan 20 kandidata hale sa manlaen-laen na parte kan Bicol an darakulang stars kan showbiz industry na sinda Maricar Reyes-Poon; Jean Garcia, Daniel Matsunaga asin an Bicolano beauty na si Miss Universe 2010 4th Runner-up Maria Venus Raj.
Naiuli man ninda Allysa Villarina kan Tabaco City an Miss Albay 2018 mantang First Runner-Up si Denise Omorog kan Catanduanes, Second Runner-Up si Jeanne Isabelle Bilasano kan Malilipot, Albay mantang Third Runner-Up man si Sandra Vivo kan Partido, Camarines Sur.
Present man tangarig na magpakilig sa serenade an matinee idol na si Gabby Concepcion mantang si Paolo Bediones man an nagsirbeng host kan event.
Mientras tanto, piglalaoman man na madugang pa sa kaogmahan an mga tugtugon kan bandang Silent Sanctuary atchan na banggi sa pormal nang pagtatapos kan sarong bulan na selebrasyon kan Magayon Festival 2018.
