LEGAZPI CITY—Nagkukundusir nin preventive measures an Catanduanes State University ngani na padagos man giraray an face to face na klase kan mga estudyante.
Ini makalihis na makaeksperyensya an provincia nin Catanduanes nin halangkaw na heat index na nagresulta sa pagkakasuspendir kan mga klase.
Segun ki Catanduanes State University President, Dr. Robert Barba, sa intrevista kan Bombo Radyo Legazpi, na igwa sindang piglalatag na mga short and long term measures ngani na dae na magsuspinder nin klase sa unibersidad.
Siring na sana an paghiling kan mga physical ventilations sa mga colleges asin pagtao nin libreng water refill sa mga estudyante.
Igwa man na pigbubusol na Pamandong Project kun saen magpapasubli nin payong sa mga estudyante na maluwas sa saindang klasrum.
Afuera digdi pigbubusol man an pagkrear nin mga parke lalo na kun talagang kinakaipuhan nin ventilation pag nasa luwas kan edipisyo.
Mientrastanto, sinabi man kan opisyal na may mga nakalatag man na mga ambulansya asin mga health care personnel en kaso man may emerhensya orog na ngonian na panahon kan tag-init.
