LEGAZPI CITY – Wara man nairehistrong untoward incidente an Catanduanes sa ibong kan magdamlag na pag-uuran na namatean kan provincia.
Segun ki Catanduanes Provincial Disaster Risk Reduction and Management Office Emergency Operations Chief Roberto Monterola sa intrevista kan Bombo Radyo Legazpi na wara sindang nairehistrong pagrasay nin daga sa ibong kan 24 hours na sindang nakakamati nin light to moderate na pag-uuran.
Dae man kinansela an mga klase sa enterong provincia afuera sa banwaan kan Gigmoto.
Wara man sindang naipaluwas na warning nin huli ta dae man nakapalaog an mga pag-uuran sa orange warning kan mga state weather bureau.
Pigtaram pa kan opisyal na dae pa nagrereport sainda an mga ibang banwaan asin munisipalidad mapadapit sa sitwasyon kan saindang lugar kun kaya dae ninda ini napapadarahan nin tabang asin asistensya.
Mantinidong passable man an mga pampublikong tinampo sa provincia asin wara man naireport sainda na mga dae maagihan kan mga behikulo.
Sa ibong kan warang ipinaluwas na no sailing policy, dae na man suboot pigpipirit kan mga parasisira na magpalaot nin huli sa makukusog na ukol kan kadagatan.
Pagirumdom ni Monterola sa publiko na mag-ingat an gabos nin huli ta pwedesir na may mangyari pang pagrasay nin daga na epekto pa man giraray kan warang patod na pag-uuran na namamatean sa provincia kan Catanduanes.
