LEGAZPI CITY- Pigkokunsiderar kan Catanduanes State University na dakulang honra an pagkakapili kan unibersidad na manggana kan Saringaya Award 2024 sa Academe Category.
Isasagibo an Awarding Ceremony sa Lunes, Hunyo 24.
Ini an katakod kan dedikasyon asin esfuersos kan unibersidad na magkrear nin mga programa sa pagprotehir sa kapalibutan.
Sa intrevista kan Bombo Radyo Legazpi sa presidente kan Unibersidad na si Dr. Patrick Alain Azanza, sinabi kaini na an Catanduanes State University an sarong Green university o bisto sa pangangataman kan kapalibutan.
Marurumduman na nabisto an unibersidad huli sa mahigot na pagkontra kaini sa iligal na pagmimina sa island province na saro sa mga pigkokunsiderar na dakulang environmental problem sa lugar.
Sinabi ni Azanza na saro sa mga nahihiling nindang rason ngani na makuwa an Saringaya Award iyo an pagigin miyembro ninda kan Tanggol Kalikasan, siring man an padagos na esfuersos sa tree planting, coastal conservation activities sa mga mangrove areas asin iba pang climate change adaptation initiatives.
