LEGAZPI CITY – Dakulang tabang para sa mga benepsiyaryo an pigo-ofrecir na libreng tuition fee kan Catanduanes State University.
Sa intrevista kan Bombo Radyo Legazpi ki Catanduanes State University President Patrick Alain Azanza, maogmang ipigheras kaini na aprubado na kan Catanduanes Board of Regents an ipgsuhestyon niya na libreng tuition fee sa mga empleyado kan unibersidad.
Kaibanan na digdi an mga tugang kan mga ini na enrolled sa unibersidad siring kan sa senior high school, magin sa Graduate School asin College of Law.
Epektibo an nasabing programa sa masunod na ralaogan sa Agosto, Academic Year, 2024-2025.
Segun ki Azanza, parte ini kan mga employees welfare and career development program sa unibersidad na ma-upgrade an educational status kan mga College Instructor sa masteral hasta sa doctoral degree.
Ipigbuyagyag man kaini na in-adapt an nasabing programa sa University of the Philippines bilang dating empleyado kan nasabing prestihiyosong unibersidad.
Katakod kaini, pigdedesidiran man kan opisyal na magin applicable an free tuition sa College of Medicine asin ibang allied courses sa mga masunod na taon.
