LEGAZPI CITY-Padagos na pinaghahanap kan mga otoridad an nagwalat kan sarong omboy sa gilid kan kalsada sa San Andres, Catanduanes.
Ini makalihis ma-respondihan kan sarong patrolwoman an sarong bagong pangaki na omboy na winalat sa irarom kan kahoy nin mangga asin sa gilid kan tinampo sa nasabing banwaan.
Segun ki San Andres Municipal Police Station Chief of Police Police Major Francis T. Tabo, sa intrevista kan Bombo Radyo Legazpi na nakaresibe sinda nin apod asin nadukayan an sarong omboy sa national highway kan lugar.
Nakabalot an omboy nin raincoat asin tulos na dinara sa hospital para sa atensyong medikal kun sain napag-araman na bago pa sana ining pangaki asin nakatakod pa saiya an umbilical cord.
Padagos an imbestigasyon kan kapulisan ngani mahanap kun sain hale an omboy asin nakikipag-koordinar na sa rural health unit ngani makakuwa nin imbentaryo kan mga bados sa manlain-lain na barangay.
Nagpapakalat na sinda nin kapulisan sa gabos na barangay ngani mabusisi kun sisay an igwang pregnancy due date ngonian na bulan.
Sa presente, wara pa suboot na nakuwang record na makakapagtao nin lead sa rural health unit kan banwaan asin wara man suboot nin record kan pangaki sa mga ospital.
Sa ngonian, sarong malusog na omboy ini asin nasa pangangalaga kan hospital asin Social Welfare and Development Office.
Nangangapudan man an otoridad sa gabos, na magin responsableng magurang asin aki, siring man sa mga estuyante, kun sinda man an may kagibo kaini, na ipadagos an saindang pag-aadal asin dai maglaog sa mga alanganin na mga sitwasyon.
