LEGAZPI CITY—Nangenot an Catanduanes Police Provincial Office sa Unit Performance Evaluation Rating sa bilog na rehiyon kan Bicol ngunyan na Agosto 2026.
Segun ki Catanduanes PPO Chief Police Community Affairs and Development Unit Police Lieutenant Colonel Josefa Sylvia Zape, sa intrevista kan Bombo Radyo Legazpi, nakakua an saindang opisina nin rating na 87.4% o “Very Satisfactory.”
Nakua suboot ninda an honra sa paagi kan nakuang 100% accomplishment kan Catanduanes Police Provincial Office siring kan kampanya kontra communist terrorist group.
Sa nasabing pagbisto nagpapahiling suboot ini na nagtatrabaho nin matanos an saindang personahes sa pagmantinir kan paz y orden.
Mientrastanto, naglangkaw man sa 7.01% an nairehistrong crime rate sa provincia puon Enero 1 hasta Agosto 31, 2026 kumpara kan nakalihis na taon.
Nakapagkontribuir digdi an index crime kun sain an mga pagbabalgar sa special laws na may 210 na numero kumpara kan nakalihis na taon na nasa 175.
Kabale man sa nakapagkontribuir sa halangkaw na datos an traffic accidents asin theft incidents.
Pagdoon niya na naglangkaw ini huli sa esfuersos kan kapulisan o kadakol na akomplishimiento sinda pag-abot sa pagpuho kan krimen.
Sa presente, nagsasagibo sinda nin mga kampanya nganing mapababa an crime rate siring kan pagbandilyo asin pagpatrolya sa komunidad.
