LEGAZPI CITY—Matrayumpong inilunsar kan Catanduanes Police Provincial Office an programang Kabataan Kontra Kriminalidad “Kabataan on the Move” sa nasambit na provincia.
Segun ki Catanduanes PPO PIO PLTCOL Rosalinda Gaston, sa intrevista kan Bombo Radyo Legazpi, an nasambit na programa may obhetong magin kaiba asin maengganyar an mga kajovenesan na magpartisipar sa mga kapulisan para sa pag-ibitar asin pag-iingat laban sa mga krimen lalo na ngunyan na papaabuton na 2025 midterm elections.
Dugang kaini na an programa may katuyuhan na ma-empower an mga kajovenesan, magin vigilant, pro-active asin makisumaro para maobserbaran an onesto, maayos asin ligtas na eleksyon.
An nasambit na forum inatendiran kan mga opisyales gikan sa manlaen-laeng ahensya kan gobyerno asin barangay kun saen nagkaigwa man nin mga diskusyon.
Siring man an pagpirma nin Memorandum of Understanding kun saen kaiba sa nagpartisipar an mga presidente kan Kabataan Kontra Droga at Terorismo (KKDAT) asin Kabataan Kontra Kriminalidad (KKK).
Nagkaigwa man nin pagpirma nin pledge of commitment siring man an pagtao nin mensahe kan Regional Director na si Police Brigadier General Andre Dizon.
Pigtaram pa ni Gaston na igwang maabot sa 600 na miyembro kan KKDAT asin KKK sa saindang provincia kun saen dakula suboot ining tabang sa crime prevention efforts kan mga kapulisan.
Mientrastanto, segun pa sa opisyal na pwedesir na magpartisipar an sarong joven basta sinda nagboluntaryo na mapuho an mga krimen sa lugar.
![Pinterest](https://pinterest.com/pin/create/button/?url=https://legazpi.bomboradyo.com/catanduanes-ppo-matrayumpong-inilunsar-an-programang-kabataan-kontra-kriminalidad-sa-provincia/&media=https://img.bomboradyo.com/legazpi/2025/02/Catanduanes.webp&description=The Catanduanes Police Provincial Office successfully launched Kabataan Kontra Kriminalidad program "Kabataan on the Move" in the province.){kind=link}