LEGAZPI CITY — Duwang dating opisyales kan Catanduanes PNP an parehong nagbuyagyag kan mga alegadong iligal na aktibidad na pinagkakaimbweltuhan kan mga kairibang pulis sa nasambitan na probinsya.
Enot kaini, nagpahayag nin kulog nin boot si PO1 Dan Bagay sa hinalian na Pandan Municipal Police makalihis na marelieve asin madisignar sa Police Regional Office 5 sa Camp Simeon Ola.
Segun ki Bagay, dae man nin “legal ground” an ginibong pagtransfer saiya asin sinahotan an mga kairibang pulis na nasa likod kan pag-relieve saiya.
Ini man an nagbusol ki Bagay ngani na ibuyagyag sa media na suboot imbwelto an mga may haralangkaw na ranggo sa Catanduanes PNP sa illegal fishing asin illegal logging.
Alagad sa intribista kan Bombo Radyo Legazpi ki PSUPT Francisco Rojas, tagapagtaram kan Catanduanes PNP, ineksplikar kaini na naibalyo si Bagay sa regional office bilang pagprotihir sa saiyang seguridad makalihis an mga matrayumpong operasyon kontra sa mga imbwelto sa iligal na droga.
Dae suboot dapat na hilingon an pag-relieve saiya bilang sarong klase nin padusa urog pa na igwa sindang sinumpaan sa trabaho na aakuon kun sain man na lugar sa Pilipinas idisignar.
Sa mga pagbuyagyag na ini kan nasambitan na opisyal siring man kan nagdemetir na si PO1 Vincent Tacorda, sinabi ni Rojas na igwa sindang mga pwedesir na dulukan kan saindang reklamo sa laog mismo kan organisasyon arog kan internal affairs office, National Police Commission (NAPOLCOM) asin grievance committee.
Kun talagang igwa nin mawot na patunayan an mga ini, darahon sana suboot an mga ebidensya asin isangat sa proper court.
Sa ngunyan, kinumpirmar kan na pinag-aadalan na ninda an magigin lakdang katakod kan ginibong pagtuyaw kan mga dati nindang tauhan.
