LEGAZPI CITY—Liwat na nagpagiromdom an Catanduanes Philippine National Police sa namamanwaan na imantenir an ligtas asin matoninong na selebrasyon nin Kapaskuhan asin Bagong Taon.
Segun ki Catanduanes Police Provincial Office Public Information Officer Police Major Emsol Icawat, sa intrevista kan Bombo Radyo Legazpi, pigpagiromdoman ninda an namamanwaan na ibitaran na an pagpaputok asin mahigot na ipigbabawal an mga ilegal na paputok siring man an pagpapaputok nin badil nganing mabitaran an anumang aksidente.
Dapat man na may pirmeng may gabay an mag kajovenesan partikularmente na kun yaon sa tinampo asin matatawong lugar.
Siertohon man na ipag-check an mga kable nin kuryente, mga kandila, asin dae pagpabayaan na nakasaksak an mga electrical appliances nganing makalikay sa insidente nin mga kasulo.
Dugang ni Icawat na en kaso man na mahali an siertohon na nakakandado an kaharongan asin ibitaran an pagmaneho kun nasa impluwensya nin arak.
Mientrastanto, mensahe man kaini na pirmeng magin mapagmatyag asin i-report sa mga otoridad an mga kaduda-dudang hiro sa komunidad.
Pig-asigurar man kan opisyal na padagos an saindang pagpapatrolya asin pagbabantay nganing masierto an ligtas asin matoninong na holiday season.
