LEGAZPI CITY – Nagtetenir na normal an sitwasyon sa provincia kan Catanduanes pirang aldaw makalihis an mga namateang pag-uuran.
Alagad segun ki Catanduanes Provincial Disaster Risk Reduction and Management Office Emergency Operations Section Chief Roberto Monterola sa intrevista kan Bombo Radyo Legazpi na dae man sinda nagpapakampante huli ta nagtetenir na huma sa provincia an pigbabantayang bagyo na nasa luwas pa kan Philippine Area of responsibility.
Katakod kaini an padagos man an saindang preparasyon partikulamente na an mga Municipal Disaster Risk Reduction and Management Offices asin nakatalaang makipag-olay sa manlain-laing ahensya.
Sa presente an wara pa man sindang pigbabanderang alert status huli sa magayon na kamugtakan kan saindang panahon.
Pigtaram pa kan opisyal na enkaso mamatean na sa provincia an epekto kan nagdadangadang na raot nin panahon an preparado sindang magtao nin abiso sa saindang namamanwaan.
Tulos man sindang magsagibo nin pre-emptive evacuation enkaso magtao na nin kasuguan an gobierno provincial partikulamente na an mga nasa low lying areas.
Pagsyerto man ni Monterola na gabos sinda naka-antabay sa kamugtakan kan panahon asin nangapodan sa publiko na kun may huma sa saindang pigteteniran an dae na magduwang isip na mag-ebakwar.
