LEGAZPI CITY—Nakapagrehistro nin anom na indibidwal an nabiktima nin paputok durante kan holiday season sa isla provincia kan Catanduanes.
Segun ki Catanduanes Police Provincial Office Public Information Officer Police Major Emsol Icawat, sa intrevista kan Bombo Radyo Legazpi, bako man serious injury an nasapo kan mga biktima kun sain tolo sa nasabing numero an pararehong menor de edad.
Kadaklan digdi an biktima nin boga, nagkapot nin paputok, mantang an iba an aksidenteng naabot kan pagputok kan firecrackers.
Dugang niya na mas halangkaw an nairehistrong nabiktima nin paputok sa presente kumpara kan nakaaging taon.
Mientrastanto, naarestar man kan saindang kapulisan sa magkakahiwalay na operasyon kontra ilegal na tupada an nasa siyam na indibidwal sa pagsabat kan Bagong Taon.
Pig-asigurar man ni Icawat na mapadagos an saindang pagpapatrolya sa mga lugar sa provincia. Siring man an pagiromdom sa publiko na likayan an mga ilegal na gibo nganing maibitaran man an problema sa saindang futuro.
