LEGAZPI CITY—Nagkundusir nin meeting an Provincial Disaster Risk Reduction and Management Council Catanduanes mapadapit sa preparasyon sa pigbabantayang bagyong Uwan.
Segun ki Catanduanes Governor Patrick Alain Azanza, sa intrevista kan Bombo Radyo Legazpi, nagsagibo man sinda nin online coordination sa mga alkalde asin mga lokal na gobierno kun saen nagkaigwa sinda nin survey kan preposition na mga paghahanda para sa mga barangay kan kada munisipyo.
Pig-abisuhan na suboot ninda an mga parasisira asin mga nakaistar sa mga coastal areas na ibitaran muna an paglawod siring man an posibleng pagpa-otob nin pre-emptive evacuation sa paglaog kan nasabing bagyo.
Dugang ni Azanza na kalimitang nasa labi 20,000 parasisira asin 30,000 abacaleros an naapektaran kada may maraot na panahon sa saindang provincia.
Nagkaigwa na man sinda nin koordinasyon sa coast guard, kapulisan, electric cooperative, Department of Public Works and Highways para sa mga pagresponde o tabang na kinakaipuhan.
Mientrastanto, pagdoon man kan gobernador na an saindang lakdang an sarong anticipatory action nganing ma-mitigate an epekto kan bagyo baka sana sa sektor kan agrikultura, food security kundi nganing maasigurar man an zero casualty sa nasabing raot na panahon.
