LEGAZPI CITY- Hagad ngonian kan National Food Authority (NFA) Bicol an pag-intindi kan mga residente kan island province kan Catanduanes huli sa dae pa nakokompletong pagreplenish sa suplay kan NFA rice.
Sa intrevista kan Bombo Radyo Legazpi ki NFA Bicol spokesperson Nelsie Alcantara, dawa tapos na an unloading kan mga bagas na hale sa Vietnam sa duwang vessels na nagdara, nauulang man an pagtransport kan bagas pasiring sa nasabing provincia huli sa mga namamateang raot nin panahon.
Katakod kaini, enot naman na nagpadara nin 1,000 bags kan NFA rice sa provincia tangarig na makonsumo kan mga residente.
Mientras tanto, preparado naman an opisina na ipadara na sa Catanduanes an mga bagas kun magrahay na an kamugtakan kan panahon.
Ipigheras pa ni Alcantara an padagos na pagbabantay kan monitoring team sa mga merkado asin accredited retail outlets urog na sa mga sumbong kan pagpapataas kan presyo kan mga ipigpapabakal na NFA rice.
