LEGAZPI CITY — Isusunod na ni Presidente Rodrigo Duterte an mga drug lord na nag-ooperar sa provincia kan Catanduanes sa irarom kan kampanya kontra sa iligal na droga.
Partikular na pinatamaan an sarong opisyal sa National Bureau of Investigation (NBI) na maghalat suboot huli sa nakatutok an mga otoridad kasunod kan pagkakadiskubre sa mega shabu laboratory sa island province kan Noviembre sa nakalihis na taon.
Dawa pa bako direktang pinangaranan, pigtutukoy ni Pres. Duterte si NBI Director Atty. Augusto Eric C. Isidoro alias “Tay Eric” na saro sa 21 katawong kinasuhan kan Philippine National Police – Bicol (PNP Bicol) kan Hulyo 4 huli sa pagkakaimbwelto sa nasabing shabu labortary.
Sinabi kan presidente an pahayag sa saiyang speech sa mass oath-taking kan Presidential appointees asin ibang organisasyon sa Malacañang.
Kun babalikan, an laboratoryo na kayang mag-producir nin dae mababa sa 300 kilo kada aldaw o katumbas nin P1.5 billion an nadiskubre sa Barangay Palta Small, Virac sa pagsadiri kan agom ni Isidoro na si Angelica Balmadrid-Isidoro.
Parte an shabu laboratory kan expose kan ginadan na brodkaster na si Larry Que kan Disyembre kun saan ipigtakod kaini si Catanduanes Gov. Joseph Cua bilang utak sa likod kan illegal drug business sa provincia.
