LEGAZPI CITY – Sarong candlelighting an ipigkondusir sa syudad kan Legazpi bilang pakikisumaro sa mga biktima kan kariribukan sa Mindanao partikular na sa syudad kan Marawi na nakakaeksperyensya nin kadahasan mapa Krisyano man o Muslim.
Segun ki Father Raymond Oreza, ini man an sinabayan nin sarong pangadyi para sa mga hostage kan teroristang grupong Maute na magin salbado an mga ini.
Dugang pa ni Oreza na saro ining paagi nin pagpapahayag nin solidarity kun sain pigsiyerto man kaini na an gabos na nagtutubod sa Diyos an nagtutubod na bako kadahasan an dapat na itanom sa puso kundi an katoninongan.
Sa ibong suboot kan magkakaibang pagtubod asin relihiyon, hagad kan gabos na matawan na nin kasimbagan an mga dae pagkakasinabutan kan lambang saro.
Nagpasalamat man an nasambitan na padi sa mga nakisumaro sa aktibidad na mga deboto asin mga youth organizations.
