LEGAZPI CITY—Idineklara na kan Department of Agriculture na bird-flu free na an provincia kan Camarines Sur.
Segun ki Department of Agriculture Bicol Spokesperson Love Guarin, sa intrevista kan Bombo Radyo Legazpi, na-detect an helang kan Abril 2025 sa sarong backyard duck farm sa banwaan kan Camaligan sa nasambitang provincia.
Huli digdi, nagkundusir nin surveillance asin monitoring an ahensya sa one-kilometer asin seven kilometer surveillance zone sa lugar, kun saen wara na suboot na nagpositibo pa sa bird flu.
Segun saiya makalihis an limang bulan idineklara na kan Bureau of Animal Industry na bird-flu free na an Camarines Sur.
Dugang ni Guarin na wara na man na iba pang nairehistrong kaso nin bird flu pagkatapos kan nairehistro sa bulan nin Abril.
Segun saiya pwedesir nang magpaluwas nin poultry products an Camarines Sur pasiring sa manlaen-laeng rehiyon kan Pilipinas.
Mientrastanto, abiso kan opisyal sa mga nag-aataman nin poultry animals na en kaso makaeksperyensya an mga ini nin mga sintomas siring kan panluluya, sipon asin abo, warang ganang magkaon, biglaang pagkagadan kan ataman na hayop, asin iba pa, na tulos ipagtaong aram sa saindang ahensya, municipal agricultural offices, magin sa veterinary offices sa saindang lugar.
