LEGAZPI CITY – Marikas na nagsagibo nin aksyon an Local Government Unit kan Camalig, Albay mapadapit sa steel bridge na buminigay sa purok 5 kan Barangay Ilawod kan nasabing banwaan.
Segun ki Camalig Mayor Caloy Baldo sa intrevista kan Bombo Radyo Legazpi na tulos nindang pinabisita an nagabang tulay sa saindang municipal engineering nganing aramon kun ano an tunay na nangyari asin kun ano pa an pwedesir gibuhon nganing dae man ini magkawsa nin labing destroso sa mga residentes.
Nakipag-koordinar na man sinda sa Department of Public Works and Highways asin nagpromesa na pupunan na ngonian na aldaw an pagpapakarhay kan naunambitang tulay.
Suspetsya ninda na bako man masasabi na overloaded an nag-aging truck alagad pwedesir suboot na nag-agi sana ini duman huli ta isinarado an tinampong talagang pig-aagihan kan mga siring na darakulang behikulo makalihis na mapag-araman na nagde-deliver sana ini kan mga materyales para sa proyekto sa nasabing barangay.
Suhestyon man kan opisyal na mas sadit kuta dapat na truck an ginamit sa pag-deliver kan mga materyales huli ta ipigtugdok an tulay para sa mga light vehicles.
Sa kagayunan suboot an nagpromesa man sainda an contractor kan truck na sinda an masagot kan gastuson sa pagpapakarhay kan tulay asin handa nang makipagtabangan sa DPWH.
Kamawotan man ni Mayor Baldo na gibuhon na sanang mas matibay an bakal na gagamiton sa tulay nganing kayanon na an gabat kan mga darakulang behikulo na maagi palaog asin paluwas kan purok 5.
