LEGAZPI CITY — Gadan an sarong lalaki mantang lugadan man an sarong menor de edad makalihis an nangyaring pambabadil sa Barangay San Francisco sa banwaan kan Sto. Domingo sa Albay.
Binisto an nagadan na biktima na si Niño Abellano, 25 anyos na residente kan Barangay Sula sa banwaan kan Bacacay asin an menor de edad na si Lea Buenbenuto.
Base sa ipinaabot na impormasyon kan mga otoridad, nag-inuman si Abellano asin suspek na si Jomer Zafe kan Barangay Del Rosario sa harong kan biktima asin nagpasiring sa beer plaza sa Barangay Poblacion.
Binayaan na kan biktima an suspek ngane na mag-uli sa saindang harong.
Mantang nag-iistoryahan an biktima, tugang kaining lalaki asin saiyang pamangkin, bigla na sanang nanuntok nin badil an suspek na luminaog hale sa likod kan saindang harong.
Sa dae maaraman na rason, makapirang beses na pinaputukan ni Zafe an biktima kun saen nadamay si Buenbenuto.
Tulos man na buminulagta si Abellano na nagsapar nin manlaen-laen na tama sa hawak na resulta kan tulos na pagkagadan.
Napag-araman man na may dati ng kaso nin pambabadil an suspek na ngunyan.
Sa ngunyan nagpaparahay na an aking babaye mantang nagpapadagos an paghahanap kan mga otoridad sa suspek ngane na masangatan nin kaso asin maikulong.
