WARNING! (SENSITIVE REPORT ABOUT SUICIDE)
Ipigbuyagyag kan abogado ni dating DPWH USec. Catalina Cabral na enot na nagprobar na maghugot an saiyang kliyente sa saiyang harong sa tahaw kan imbestigasyon sa maanomalyang flood control projects.
Segun kay Atty. Mae Divinagracia, an enot na suicide attempt ni Cabral nangyari pirang aldaw makalihis an hearing kun saen an idinawit an saiyang pangaran ni dating DPWH USec. Roberto Bernardo.
Digdi, inakusaran ni Bernardo si Cabral na iyo an suboot kontrolado an National Expenditure Program kan DPWH sa pamamayo kan mga dating Secretaries kan DPWH na si Mark Villar asin Manuel Bonoan.
Pigprobaran suboot kan dating opisyal na saksakon an saiyang sadiri gamit an kutsilyo alagad napugulan siya kan saiyang aking babae asin inagaw saiya an kutsilyo.
Naglukso man suboot si Cabral sa hagdan kan saindang harong.
Ilinadawan kan abogado an enot na pagprobar ni Cabral na tapuson an saiyang buhay bilang sarong “tipping point” na sinabi niyang nag-ugat sa saiyang pagkatanggal sa pwesto, na iyo an sa paagi nin sarong courtesy resignation.
Segun sa abogado, hinagadan suboot si Cabral na magsumite kan saiyang resignation sa tahaw kan imbestigasyon makalihis na magserbe ini nin 40 taon sa DPWH asin pinagkaitan nin retirement pay.
Sa mismong aldaw man kan pagkagadan ni Cabral, duwang beses siyang buminaba sa behikulo sa may Kennon Road asin saiyang pighiling an taas asin rarom kan bangin, base na man sa salaaysay kan saiyang driver.
Naobserbaran man suboot na naka-eksperyensya nin depresyon an dating opisyal huli sa kawaran nin ganang magkaon asin inapodan man suboot an abogado nganing tukaron an mga bagay na napag-olayan na suboot.
Dae suboot na-diagnose an dating opisyal huli ta nagsayuma ining maghagad nin professional help huli ta abo niyang magkaigwa nin rekord na naka-eksperyensya siya nin mental illness.
Magigirumduman, nagadan si Cabral kan Disyembre 18 makalihis madukayan an saiyang hawak sa sarong bangin sa may Kennon Road, Tuba, Benguet.
