Nakikipakoordinar na an Civil Aviation Authority of the Philippines (CAAP) sa counterparts kaini sa Malaysia asin Singapore nganing manmanan an tolong rehistradong air assets kan nagbutas na si dating Ako Bicol Rep. Zaldy Co.
Sinabi ini ni CAAP Director General Raul del Rosario kasunod kan anunsyo kan ahensya na presenteng nasa Kota Kinabalu, Malaysia an duwang AgustaWestland helicopters na konektado ki Co na nagpasiring suboot duman kan Agosto 20 asin Setyembre 11.
Nasa Singapore man suboot an Gulfstream aircraft puon pa kan Agosto 16.
Afuera sa tolong air assets ni Co, pigmamanmanan man kan ahensya an 10 iba pa na nagtetenir na nasa ibang nacion.
Magigiromdomang kan nakaaging bulan, ibinuyagyag ni DPWH Sec.Vince Dizon na naabongan kan CAAP an pagporbar kan mga kompaniyang konektado ki Co na i-deregister an nasa tolong chopper na hinagad na ma-freeze kan DPWH.
Mientrastanto, ibinuyagyag man kan CAAP official na warang air assets na nakarehistro sa irarom kan pangaran ni dating House Speaker Martin Romualdez.
Magigiromdomang sinda Co asin Romualdez an parehong nakaladkad sa isyu kan maanomaliyang flood control projects na nakaresibe suboot nin kickback, bagay na pirang beses na ipignigar kan duwa.
