Gadan an siyam na katawo sa pag-atake kan mga pinagtutubudang miyembro kan militanteng grupo sa sarong bus sa Jammu province kan Kashmir region sa India.
Segun kay Vishesh Mahajan an senior administrative officer kan lugar, lunad kan nasabing bus an mga Hindu na papasiring kuta sa templo kan Mata Vaishno Devi.
Alagad pag-abot sa pinangyarihan kan insidente, bigla na sanang pinauranan nin bala kan mga armadong suspek an bus.
Nawaran nin kontrol an driver hasta sa mahulog an bus sa hirarom na bangin.
Tulos na binawian nin buhay an siyam sa mga sakay kan behikulo mantang 33 na iba pa an nalugadan.
Sa ngunyan naglunsar na an gobyerno kan India nin imbestigasyon sa insidente mantang nagpadara naman nin mga suldado ngani na madakop an mga responsable.
