LEGAZPI CITY- Nagpamate man nin abnormalidad an bulkang Bulusan sa provincia kan Sorsogon sa mga nakalihis na oras sa pagkakarehistro kan pagbuga nin abo sa saro sa mga vents kaini.
Susog sa datos kan Philippine Institute of Volcanology and Seismology (Phivolcs) latest seismic monitoring network, naobserbaran an maluyang buga kan abo sa nasabing bulkan na nag-abot sa 50 metro an langkaw hale sa southeast vent.
Dinara man kan paros an steam-laden plumes o puting abo pasiring sa sur-sirangang parte kan bulkan o sa direksyon kan banwaan kan Bulusan.
Wara man na nairehistrong linog na may kinaaraman sa latest activity kan bulkan.
Nakakaag man sa precise leveling data na isinagibo kaito pang Nobyembre 20-29, 2017 na nagkaigwa nin diit na pag-impis o deflation sa lawas kan bulkan na nakumpirmar man sa mga datos hale sa tilt asin padagos na GPS data.
Magigirumduman na nakabandera an Alert Level 1 status sa Mt. Bulusan na nangangahulugang nasa abnormal level an nasabing bulkan huli naman sa aktibong hydrothermal processes sa laog na posibleng magdara nin mga steam driven o phreatic eruptions.
