LEGAZPI CITY- Dae nakapagrehistro nin anuman na aktibidad an bulkang Mayon sa ibong kan warang patod na mga pag-uran sa provincia kan Albay.
Segun ki Philippine Institute of Volcanology and Seismology resident volcanologist Dr. Paul Alanis sa intrevista kan Bombo Radyo Legazpi na wara man na nairehistrong volcanic earthquake asin rockfall event sa nakalihis na magdamlag.
An mga pag-uran sa provincia an dae man nakapag trigger nin lahar events.
Paliwanag kan opisyal na maski pa warang pundo an mga pag-uran, bako man dakol an volume kaini kun ikukumparar sa nakalihis na mga panahon na igwang nag-aging bagyo sa provincia.
Napag-araman na basado sa huring pagsukol kan ahensya durante kan Mayon eruption, pigkakakulong nasa 90 million cubic meters an debris na posibleng idausdos hali sa bulkan.
Alagad segun ki Alanis na padiit-diit na man ining naibababa huli sa mga pag-uran asin mga nakalihis na raot nin panahon.
