LEGAZPI CITY-Padagos an pagpapahiling nin halangkaw na aktibidad kan Bulkang Mayon sa ika-32 sunod na aldaw kun sain nagkakaigwa ini nin“effusive eruption”, susog sa Philippine Institute of Volcanology and Seismology (PHIVOLCS).
Nakapagrehistro liwat nin pagbuga kan lava o “lava effusion” hale sa summit crater kaini.
Nagresulta ini nin mga rockfall, incandescent lava flows, asin Pyroclastic Density Currents (PDC) o bisto sa apod na “uson.”
Uminabot na lava flow sa 3.77 kilometro sa Basud Gully (silangan), 1.59 kilometro sa Bonga Gully (timog-silangan), asin 1.34 kilometro sa Mi-isi Gully (timog).
Susog sa monitoring sa nakalihis na 24 oras, nakapag-rehistro nin nasa 401 rockfall events, 17 PDCs, duwang volcanic earthquakes, nagbuga nin 1,799 tonelada kan sulfur dioxide.
Sa presente, nagtetenir na nasa Alert Level 3 an Bulkang Mayon.
Mahigot man na pinagbabawal an paglaog sa 6-kilometer Radius Permanent Danger Zone (PDZ) huli sa banta kan biglaang pagsabog, rockfall events asin an epekto kan uson hale sa Bulkan.
