LEGAZPI CITY—Sinaysay kan Philippine Institute of Volcanology and Seismology na nasa eruptive stage an bulkang Mayon puon pa kan Enero 6, 2026.
Segun sa pahayag ni Phivolcs Volcano Monitoring and Prediction Chief Mariton Bornas, na sa ngunyan an pagkakaiba iyo an naobserbaran na mas ‘energetic’ na eruption kumpara kan mga nakalihis na bulan.
Sa ibong kan na-monitor na pagbaba kan mga aktibidad kaini kan mga nakalihis man na bulan alagad huli kan mga nanutaran na volcanic-tectonic earthquakes swarm sa parte kan banwaan kan Sto. Domingo na niyugo nin 5.4 magnitude kan Hunyo 5, an ini suboot an senyales na igwang bagong ‘intrusion’ sa irarom kan magma supply system kan bulkan.
Dara kan naunambitang intrusion, nagluluwas sa ngunyan nin bagong batch nin magma huli kan paglangkaw kan sulfur dioxide emission kan Hulyo 10-11.
Pagdoon kan opisyal na sa presente igwa nin mas makukusog na strombolian activity, asin nagkakaigwa nin sporadic o panaka-naka alagad warang pundong episode nin strombolian explosion.
An strombolian activity an nagtutukoy sa pagsakat kan magma na may darakulang gas bubbles na nagsasabog pag-abot sa bunganga kan bulkan.
Afuera digdi, naobserbaran man an mga saradit na lava fountaining na nasa laog kan bunganga na mantang dae haros nagluluwas alagad naghahatod nin mas kadakol na lava sa mga gully; siring kan bagong pagluwa nin lava sa Mi-isi gully, Mabinit, asin Basud gully.
Naobserbaran man kan ahensya an bagong pagdaloy nin bagong lava flow sa may Mi-isi gully, na may pig-aagihan na medyo matarik na slopes sa bulkan na nagreresulta sa ashfall asin pigtangay pasiring sa sirangan asin timog na parte kan bulkan.
Segun sa ahensya na mantinidong nasa alert level 3 an bulkang Mayon.
