LEGAZPI CITY-Nakapagrehistro nin nasa nin 339 rockfall events asin iba pang volcanic materials an Bulkang Mayon sa bilog na magdamlag.
Susog sa pinakahuring datos kan Philippine Institute of Volcanology and Seismology (Phivolcs) na nagabot na sa 3.8 km an lava sa may Basud gully, 3.2 km sa Bonga gully asin 1.8 km sa Mi-isi gully.
Padagos man an panaka-naka asin maluluyang Strombolian activity kan Bulkan.
Afuera digdi, nairehistro man kan ahensya an 17 volcanic earthquakes kabale an 14 volcanic tremors na naghahaloy nin 6-35 minutos asin 5 pyroclastic density current signals o uson.
Padagos man an pabuga kaini nin 1,594 tonelada kan Sulfur Dioxide poon Hunyo 13, 2026.
Mientras tanto, nagabot man sa 750 metro an langkaw kan Plume kaini hale sa crater.
Huli digdi, mahigot man giraray an patanid kan mga otoridad sa mga residentes na ibitaran an paglaog sa 6km permanent danger zone.
