LEGAZPI CITY – Liwat na nakapagrehistro an nin mga aktibidad an Bulkang Bulusan sa nakalihis na magdamlag.
Segun ki Philippine Institute of Volcanology and Seismology Bulusan Volcano Observatory Resident Volcanologist April Dominguinao sa intrevista kan Bombo Radyo Legazpi na basado sa latest 24 hour monitoring, nakapagrehistro nin 13 volcanic earthquakes kabale an sarong volcanic tremor na nagdurar nin 39 minutos.
Nag-abot man sa 679 tons/day an nairehistrong sulfur dioxide emmision asin makusog na pagsingaw na may langkaw na 100 meters na pigtatalyap sa western side kan nasabing bulkan.
Padagos man an pagkakaigwa nin paghubag kun kaya nagtetenir sa Alert level 1 asin pigpapalikay an publiko sa paglaog sa 4km permanent danger zone asin sa 2km extended danger zone sa southeast sector kan bulkang bulusan.
Pigtaram pa kaini na sa mga nakalihis na mga aldaw, narisa ninda na pabago-bago an mga nairerehistro nindang aktibidad kan bulkan kada aldaw kun kaya mas kaipuhan suboot an pag-iingat kan gabos.
Kun hihilingon man an mga parametro, padagos suboot an abnormalidad kan bulkan kun kaya dae pa ninda masabi kun nuarin ibababa an alert level 1 pasiring sa alert level zero.
Dae man ninda pighahale an posibilidad na mautro giraray an sarong phreatic eruption huli sa mga serye kan aktibidad kaini.
Pigtawan doon pa ni Dominguinao na susog man sa paglibot kan saindang quick response team sa pagkuwa nin impormasyon kan mga barangay na naapektaran kan pagsabog kan bulkan an napag-aramang mas dakol an nadanyaran kan April 29 kompara kan April 28 eruption kan Bulusan volcano.
