LEGAZPI CITY — Nilinaw kan Municipal Disaster Risk Reduction and Management Office (MDRRMO) kan Sto. Domingo na isolated case sana an naibaretang may “ulod” suboot an itinaong plastic nin mga bagas kan Metro Manila Development Authority (MMDA) na hale sa Caloocan City.
Segun ki MDRRMO head Eng. Edgar Balidoy, bukbok an nahiling sa mga bagas asin bako mga ulod na normal sana sa stocked na bagas. An mga siring kaini an dae man suboot nakakaraot sa salud kan tawo urog na kun sasawsawan nin maray.
Wara man suboot na mabata o maraot na parong an bagas kundi an normal na parong kan NFA rice.
Mientras tanto, paglilinaw man ni Balidoy na pinakaray an listahan kan evacuees kun sain nabawasan nin walong pamilya an evacuees na naging 760 na sana.
Dugang pa kan opisyal, naghahalat man sinda nin decampment order hale sa provincial government kun kaya sa ngonian pangapudan kaini sa mga residentes na magtios-tios muna kan sitwasyon asin dae makasibot na mag-decamp.
