Nadiskubre an build-up o pagdakol kan mga barkong panggera asin fighter jets kan Amerika harani sa Iran.
Ini an nangyari sa tahaw kan pag-pressure kan Estados Unidos sa Islamic country manungod sa military program kaini asin an dai pa sana nahahaloy na deadly crackdown sa mga protester.
Kabali sa mga nahiling harani sa Iran iyo an aircraft carrier kan Estados Unidos na USS Abraham Lincoln, na nangengenot sa sarong strike group na may tolong guided missile destroyer asin 90 aircraft kabali an mga fighter jet, na napabaretang ipinadara sa Gulf region kan huring parte kan Enero alagad dai pa nahihiling sa mga satellite imagery sagkod ngonyan.
Sa ibong kan natunton an lokasyon kaini sa kadagatan kan Oman, pigkakarkulong 700 kilometers an distansya hale sa Iran .
Nagreport man an Estados Unidos na ipinadara kaini an USS Gerald R Ford, an pinakadakulang barkong panggera sa enterong kinaban, pasiring sa Middle East, na piglalaoman na maabot sa rehiyon sa masunod na tolong semana.
Kan nakaaging Martes, nakatalaan na magtiripon sa Switzerland an mga opisyal kan Amerika asin Iran para sa ikaduwang parte kan orolay nganing mapahupa an tensyon sa pagultanan kan duwang nasyon.
Segun sa Iran na an pokus kan pagtiripon iyo an saindang nuclear programme asin an posibleng paghale kan mga economic sanctions na ipinaotob kan Estados Unidos.
