LEGAZPI CITY- (UPDATE) Human error o pagkukulang kan mismong mga drayber an kawsa kan mga aksidenteng nangyayari sa banwaan kan Daraga.
Ini an sinabi kan hepe kan Daraga Municipal Police na si PSUPT Elcid Roldan.
Susog sa pahayag kan hepe, igwa nin mga drayber na kulang an kaaraman pag-abot sa mga batas-trapiko maski sa mga simpleng road signs.
Katakod kaini, suhestyon ni Roldan na higutan pa an pag-isyu nin driver’s license sa paagi kan pagsagibo nin seminar asin liwat na pagpapagibo nin practical exam antes na ma-renew an lisensya.
Kaipuhan suboot na magin seryoso an gobyerno sa siring na bagay huli ta dakol na buhay an nasasakripisyo huli sa mga iresponsableng pagmamaneho.
Alagad maski kun kulang sa mga patanid sa tinampo, sinabi ni Roldan na makakaibitar man giraray sa aksidente kun malikay an mismong drayber.
Mientrastanto, tinawan duon kan opisyal na urog na importante an buhay kan tawo kumpara sa kahoy katakod kan nangyaring karambola nin tulong truck sa Villahermosa, sa parehong banwaan na ikinagadan kan sarong drayber huli sa nakalaylay na sanga nin acacia.
Sa ibong kaini, aminado si Roldan na igwa man nin pagbalgar sa lado kan truck kun sain naglampas ini sa height limit kan mga kargang ekipahe.
Magigirumduman na enot nang sinabi kan DPWH Bicol na dae naaksyunan an nasambitan na problema huli ta dae pa nag-iisyu nin permit an DENR ngani na maputol an nakakaulang na sanga.
