LEGAZPI CITY – Antes an pakikisumaro sa mahiwasang hiro protesta nganing kondenahon an korapsyon sa gobierno an nagkondusir muna nin preparasyon an student council kan Bicol University.
Segun ki BU University Student Council Public Information Officer Jan Sander Aban sa intrevista kan Bombo Radyo Legazpi na nagsagibo sinda nin educational discussion kabale an mga student councils kan ciudad.
Bitbit man ninda sa saindang pagbale an mga placard asin poster kun sain nakasurat an saindang agrangay asin pangapodan kan publiko sa gobierno.
Afuera sa sainda an nakisumaro man sa protesta an mga estudyante gikan sa manlain-laing eskwelahan asin unibersidad, progresibong grupo nin mga jovenes.
Pigtaram pa ni Aban na may nakisumaro na mga ka-jovenesan sa ibong kan pagigin busy ninda sa saindang pag-aadal na dakulang tabang sa pagkalampag kan namamanwaan sa mga presenteng lideres kan Pilipinas.
Punto niya na labing nakaka-apektar an korapsyon bako sana sa futuro kan sektor kan edukasyon kan nacion kundi pati na an futuro kan mga estudyante asin jovenes kun kaya nakikisumaro sinda sa hiro protesta huli ta may nahihiling sindang sala.
Pagladawan niya man kun buhay si Andres Bonifacio an makikisumaro suboot ini sa pangapodan na may mapanimbag sa mga nakatukaw na pulitiko.
Pagdoon pa ni Aban kaipuhan ngonian na rumdumon an parte kan historya, dae pagkulungon an sadiri sa eskwelahan asin magpasiring sa mga kakalsadahan huli ta yaon duman an tunay na laban.
