LEGAZPI CITY-Pinatanggal na kan Bangko Sentral ng Pilipinas ngonian na aldaw sa e-wallet platforms an links kan online gambling sites.
Kinumpirma ini ni BSP Deputy Governor Mamerto Tangonan sa isinagibong pagdangog sa Senate Committee on Games and Amusement.
Segun kay Tangonan, tinawan ninda nin 48 oras ngani tumalima an mga e-wallet platforms.
Kinuwestiyon man Senador Alan Peter Cayetano, orog na pigsierto kan Department of Information and Communications Technology (DICT) na dapat tanggalon na an mga link sa kaparehong aldaw.
Dagdag pa kan senador, dai dapat paghalaton an paglilitis bago magpaotob nin aksyon asin sinabi niya bilang sarong regulator kan e-wallets, dapat mas makaskas an central bank sa pagpapaotob kan mahigot na regulasyon laban sa ilegal na online gambling.
Sinabi man kan ahensya na obheto kaini na tawan nin bastanteng oras an gabos na e-wallet operators ngani masierto an pagtanggal kan links asin maipaaram ini sa publiko.
Alagad nanindugan man giraray si Cayetano na mas importante an tulos na aksyon maibitaran an pagdadakol kan mga biktima kan pagsusugal sa online.
