Nagsuhestyon an Bangko Sentral ng Pilipinas (BSP) nin mas mahigot na regulasyon nganing limitaran an pagggamit nin mga digital payment platform sa online gambling.
Kaiba digdi an uro-aldaw na limitasyon sa fund transfer sa online gaming account kan parataya, na dae malagpas sa 20% kan average daily balance kaini.
Oobligaron man kan BSP an mga payment service provider na magbugtak nin uro-aldaw na oras nin transaksiyon, na dae malagpas sa anom na oras, para sa pagproseso na may kinaaraman sa online gambling.
An mga BSP-regulated na kompanya an dapat magbugtak nin limit para sa labing paggamit nin online gambling payment. Kun maglagpas digdi, magkakaigwa nin 24-oras na “cooling off” period bago giraray makapaglipat nin kwarta.
Boot sabihon, an masunod na transfer an magigibo sana kun natapos na an pause period.
Susuguon man kan Bangko Sentral an mga financial institution na i-disable o tangkason an gabos nin opsyon sa pagpapautang kun naka-link an e-wallet nin sarong indibidwal sa online gambling account.
Bawal man an online gambling ads afuera kun tugot an user asin dae pwedesir mag-intra sa e-gambling an mga empleyado kan mga financial institution.
Obheto kan BSP na maprotehiran an publiko gikan sa adiksyon asin pinansiyal na problema kawsa kan online gambling.
