LEGAZPI CITY – Ipigsaysay kan sarong broadkaster an nangyari sa saiya katakod kan suboot na pananakot asin pagbabanta saiya kan bodyguard ni Daraga Mayor Jerry Jaucian.
Sa intrevista kan Bombo Radyo Legazpi ki Jolas Lazado, pighayag kaini na nagpasiring sana siya sa munisipyo kan Daraga ngani na maghanap nin bareta kan makaresibe siya nin apod hali sa sarong Joseph Aguilar na nagpapatabang ngani na makaluwas hali sa opsina kan alkalde.
Pighayag suboot ni Aguilar na pigtataram na bagong naka assign sa Albay para sa Citizens crime watch na nagpasiring sana siya sa opisina kan alkalde ngani na haputon ini katakod kan operasyon kan Small Time Lottery (STL) alagad dinara ini sa sarong secret room.
Huli digdi tulos man na tinabangan ni Lazano an nasambitan na abogado kan biglang masabatan si Retired SPO4 Llasos na bodyguard ni Mayor Jaucian asin pigmuda si Aguilar kun kaya pinugulan ini ni Lazado ngani na kumalma alagad mas nadagit pa suboot ini.
Makalihis an insidente an inimbitaran suboot niya an nasambitan na abogado sa saiyang programa sa radyo ngani na maaraman an bilog na detalyes alagad kinaagahan, nabaretaan na sana kaini na nagpost na sa social media an retiradong pulis kan pagbabanta kaini rason ngani na maghagad na siya nin tabang sa mga pulis.
Kan maghilingan suboot sinda kan nagsunod na aldaw sa parehong munisipyo, pigmuda suboot siya asin pinatanidan an saiyang buhay kun kaya nahandal na siya.
Pigduon ni Lazado na kun igwang maraot na mangyari saiya, siyertong si Llasos an mag kagigibuhan kaini.
