LEGAZPI CITY—Pigkahaditan ngunyan kan mga residentes kan Barangay Mi-isi, Daraga, Albay, kun sain maagi an lahar gikan sa bulkang Mayon en kaso makaeksperyensya nin mga pag-uuran sa mga masunod pang aldaw.
Segun sa intrevista kan Bombo Radyo Legazpi ki Kapitan Nonito Alemania kan nasabing barangay, sa presente pigproblema ninda an pagbago kan river channel na pig-agihan kan baha o lahar huli sa nasaraduhan na an dating gully sa may parte kan saindang lugar.
Huli man sa nasarado na an nasabing gully, posible man na agihan kan baha o lahar en kaso may mga pag-uran an parte kan Barangay Salvacion, Anoling-Miisi Gully, asin parte kan Cagsawa sa Barangay Busay.
Dugang kaini na naka-monitor sa saindang lugar an Municipal Disaster Risk Reduction Management Office – Daraga huli sa mga piglalaomang raot na panahon na pwedesir makaapektar sa nacion.
Mientrastanto, mensahe kaini sa mga residentes kan saindang barangay na pirmihang mag-ingat sagkod na dae pa tigbababa an alerto kan bulkang Mayon na presenteng nasa Alert Level 3.
