LEGAZPI CITY – Pig-aagrangay kan mga opisyal kan Barangay Lamba, Legazpi City an kakulangan nin evacuation centers sa saindang barangay urog na ngunyan na padagos an namamatean na raot kan panahon.
Segun kay Corazon Atento, kagawad kan naunambitang barangay sa intrevista kan Bombo Radyo Legazpi na kulang an mga evacuation center nin huli ta gabos na residente na nakaistar sa may baybayon an pigpapa-ebakwar pag nagkukusog an mga namamatean na pag-uuran sa syudad.
Sarong simbahan asin tulong room sana kan eskwelahan an pwedeng sirungan kun enkaso magkaigwa nin pre-emptive evacuation nin huli ta an iba sa mga ini an raot na asin dae na mapakinabangan.
Sa kakulangan nin evacuation center sa saindang barangay, nag-eevacuate suboot an ibang pamilya sa saindang mga kapamilya o kataraid na may dakula asin makusog na pondasyon na mga kaharongan.
Pigtaram man ni Atento na plano kan saindang barangay na palagan nin lanob an saindang covered court nganing gibuhon na evacuation center.
Pangapodan man kaini sa gobyerno lokal kan Legazpi na madugangan pa an mga evacuation centers sa saindang barangay nganing may mga masisirungan an saindang nasasakupan enkaso maghalangkaw an tubig asin baha kada magdakol an pigbabagsak na uran sa syudad.
