LEGAZPI CITY — Plano kan kapitan kan Barangay Busay sa banwaan kan Daraga, Albay na pa-bendisyunan an tinampo na pinangyarihan kan karambola kan 12 lunadan na guminadan sa anom na katawo.
Segun ki Kapitan Ramon Nidua, hahagadon sa padi na bendisyunan an lugar hale sa Malabog pasiring sa Busay huli ta binansagan na ining “killer highway”.
Nagtutubod kaya an kapitan na dapat isagibo an lakdang tangarig mabawasan an aksidente.
Afuera kaini, plano man ni Nidua na mag-request sa Lunes sa Department of Public Works and Highways (DPWH) na kaganan nin signages asin limitaran an speed kan mga behikulo urog na pabulusok an tinampo sa nasabing lugar.
Hahagadon man kaini an pagbugtak nin footbridge urog na yaon an Cagsawa Ruins sa barangay sa pagtatao nin proteksyon an mga nagbibistang turista para sa delikadong highway.
Huli man sa nangyaring karambola, nagdara ini nin takot sa mga residentes sa pag-agi sa pinangyarihan kaya tangarig dae na liwat masakripisyo an buhay kan tawo, makaag man ini nin tanod para sa trapiko.
